Bootstrap Image Preview

Adil Lucknowi - Dum - janab dum ki ajab nafsiyat hoti hai

janab dum ki ajab nafsiyat hoti hai 

ki is ki jumbish-e-adna me.n baat hoti hai 

-------------------*-------------------

vafa ke jazbe ka iz.har dum hilana hai 

jo dum khaḌi hai vo nafrat ka taziyana hai 

-------------------*-------------------

jo lambi dum hai vo ali-sifat hoti hai 

jo muḳhtasar hai baḌi vahiyat hoti hai 

-------------------*-------------------

vo jan-dar mukammal nahi.n adhura hai 

vo jis ke dum nahi.n hoti hai vo lanDura hai 

-------------------*-------------------

jaha.n me.n yuu.n to hai u.ncha maqam insa.n ka 

magar lanDuro.n me.n aata hai naam insa.n ka 

-------------------*-------------------

mai.n sochta huu.n jo insa.n ke dum lagi hoti 

kasar jo baaqi hai vo bhi na rah ga.i hoti 

-------------------*-------------------

vo apni jaan bachane ko ye sipar leta 

jo haath se nahi.n kar paata dum se kar leta 

-------------------*-------------------

kuchh is tariqe se radd-e-amal hua karta 

guzarti dil pe to dum par asar mila karta 

-------------------*-------------------

ḳhushi ka jazba ubharta to dum uchak jaati 

koi udaas jo hota to dum laTak jaati 

-------------------*-------------------

kisi pe dho.ns jamata to dum uTha leta 

kisi se dho.ns jo khata to dum daba leta 

-------------------*-------------------

buzurg log javano.n se jab ḳhafa hote 

zaba.n pe un ke ye alfaz barmala hote 

-------------------*-------------------

tumhe.n ḳhabar nahi.n thi kaisi an-ban ki dum 

kaTa ke bech li tum ne to ḳhandan ki dum 

-------------------*-------------------

kahi.n jo fateh-e-azam koi khaḌa hota 

mire ḳhayal me.n yuu.n pose de raha hota 

-------------------*-------------------

baḌe ġhurur se lahra raha hai dum apni 

baja.e mo.nchho.n ke sahla raha hai dum apni 

-------------------*-------------------

sabha me.n jab koi dastur-e-nau bana karta 

shumar-e-ra.e kuchh is tarah se hua karta 

-------------------*-------------------

jo log us ke muafiq hai.n dum uTha le.n vo 

jo log us ke muḳhalif hai.n dum gira de.n vo 

-------------------*-------------------

amiir logo.n ki dum me.n a.nguThiya.n hoti.n 

a.nguThiyo.n me.n nagino.n ki buTiya.n hoti.n 

-------------------*-------------------

ghamanD aur bhi baḌh jaata aur itrate 

ye log jeb-ghaḌi apni dum me.n laTkate 

-------------------*-------------------

hasin log kisi tarah se nibha lete 

na milta kuchh to faqat dum ko hi ra.nga lete 

-------------------*-------------------

jo muflisi se kabhi koi apni jhhallata 

to haspatal me.n le ja ke dum kaTa aata 

-------------------*-------------------

hasin logo.n ki phulo.n se dum Dhaki hoti 

ki phuljhaḌi si fazao.n me.n chhuT rahi hoti 

-------------------*-------------------

dumo.n se phir qad-e-zeba kuchh aur saj jaate 

kaha.n ki zulf ki dum hi me.n dil ulajh jaate 

-------------------*-------------------

ye iftiḳhar jo ham ashiqo.n ko mil jaata 

har ek ġhuncha-e-ummid dil ka khil jaata 

-------------------*-------------------

kisi ko bazm me.n ham apna yuu.n pata dete 

baja.e paa.nv dabane ke dum daba dete 

-------------------*-------------------

kabhi kamand ka jo kaam dum se ho jaata 

ham ashiqo.n ka baḌa naam dum se ho jaata 

-------------------*-------------------

ishara kar ke hame.n dum vo apni laTkate 

ham un ke koThe pe dum ko pakaḌ ke chaḌh jaate 

-------------------*-------------------

hamari raah ka har ka.nTa phuul ho jaa.e 

agar dua ye hamari qubul ho jaa.e 

-------------------*-------------------

ki aadmi ke liye dum bahut zaruri hai 

baġhair dum ke har ik aarzu lanDuri hai 

-------------------*-------------------

Popular Shayaries Masti Tafri Mazakia Shayari

Posted In : Adil Lucknowi

12-Jul-2017
278 views

0 Comments