Bootstrap Image Preview

Ankho.n me.n raha dil me.n utar kar nahī.n dekha

a.nkho.n me.n raha dil me.n utar kar nahī.n dekha 

kashtī ke musafir ne samundar nahī.n dekha 

--------------------*-------------------

be-vaqt agar ja.ū.nga sab chau.nk paḌe.nge 

ik umr huī din me.n kabhī ghar nahī.n dekha 

--------------------*-------------------

jis din se chala huu.n mirī manzil pe nazar hai 

a.nkho.n ne kabhī miil ka patthar nahī.n dekha 

--------------------*-------------------

ye phuul mujhe koī virasat me.n mile hai.n 

tum ne mira ka.nTo.n bhara bistar nahī.n dekha 

--------------------*-------------------

yaro.n kī mohabbat ka yaqī.n kar liya mai.n ne 

phūlo.n me.n chhupaya hua ḳhanjar nahī.n dekha 

--------------------*-------------------

mahbūb ka ghar ho ki buzurgo.n kī zamīne.n 

jo chhoḌ diya phir use muḌ kar nahī.n dekha 

--------------------*-------------------

ḳhat aisa likha hai ki nagīne se jaḌe hai.n 

vo haath ki jis ne koī zevar nahī.n dekha 

--------------------*-------------------

patthar mujhe kahta hai mira chahne vaala 

mai.n mom huu.n us ne mujhe chhū kar nahī.n dekha 

--------------------*-------------------

Dard Shayari Dil Shayari Duniya Shayari

Posted In : Bashir Badr

12-Aug-2017
129 views

0 Comments