Bootstrap Image Preview

Ham apne-ap ki pahchan le ke aa.e hai.n

ham apne-ap ki pahchan le ke aa.e hai.n 

na.e suḳhan na.e imkan le ke aa.e hai.n 

----------------*-----------------

hava ne vaar kiya to javab pa.egi 

ki ham charaġh bhi tufan le ke aa.e hai.n

----------------*----------------- 

charaġh-e-qurb se kar dijiye unhe.n raushan 

bujhe bujhe se kuchh arman le ke aa.e hai.n 

----------------*-----------------

javab de na sakega hamari bato.n ka 

ki aap aa.ina hairan le ke aa.e hai.n 

----------------*-----------------

in a.nsuo.n ka koi qadr-dan mil jaa.e 

ki ham bhi 'mir' ka divan le ke aa.e hai.n 

----------------*-----------------

hamare paas faqat dhuup hai ḳhayalo.n ki 

jhulaste ḳhvabo.n ki dukkan le ke aa.e hai.n 

----------------*-----------------

ye zaḳhm-e-dil nahi.n ehsan ki nishani hai 

ham us nigah ka ehsan le ke aa.e hai.n 

----------------*-----------------

jo parsa ho to kyuu.n imtiha.n se Darte ho 

ham e'tibar ka mizan le ke aa.e hai.n 

----------------*-----------------

unhi.n pe saare masa.ib ka bojh rakkha hai 

jo tere shahr me.n iman le ke aa.e hai.n 

----------------*-----------------

Khuda Shayari Yaad Shayari zindagi

Posted In : Manzar Bhopali

09-Jul-2017
152 views

0 Comments