Bootstrap Image Preview

Hamare dil pe jo zaḳhmo.n ka baab likkha hai

hamare dil pe jo zaḳhmo.n ka baab likkha hai 

isi me.n vaqt ka saara hisab likkha hai 

----------------*-----------------

kuchh aur kaam to ham se na ho saka lekin 

tumhare hijr ka ik ik azaab likkha hai 

----------------*-----------------

suluk nashtaro.n jaisa na kijiye ham se 

hamesha aap ko ham ne gulab likkha hai 

----------------*-----------------

tere vajud ko mahsus umr bhar hoga 

tere labo.n pe jo ham ne javab likkha hai 

----------------*-----------------

hua fasad to is me.n nahi.n kisi ka qusur 

hava-e-shahr ne mausam ḳharab likkha hai 

----------------*-----------------

agar yaqin nahi.n to uTha.iye tariḳh 

hamara naam ba-sad-ab-o-tab likkha hai 

----------------*-----------------

Dard Shayari Dil Shayari zindagi

Posted In : Manzar Bhopali

09-Jul-2017
287 views

0 Comments