Bootstrap Image Preview

Har qadam hadse har nafs talḳhiya.n

har qadam hadse har nafs talḳhiya.n 

zindagi barq tūfa.n ḳhiza.n a.ndhiya.n 

----------------*-----------------

rafta rafta yahi bojh lagne lagi.n 

kyuu.n baḌi ho ga.ii.n maa.n tiri beTiya.n 

----------------*-----------------

meri duniya tiri zaat me.n qaid hai 

mujh ko ḳhairat me.n de na azadiya.n 

----------------*-----------------

tirgi ḳhamushi bebasi tishnagi 

hijr ki raat me.n ḳhamiya.n ḳhamiya.n 

----------------*-----------------

aap hi a.ndhiy.o.n se ulajhte rahe 

mai.n to laa.i thi daman me.n purva.iya.n 

----------------*-----------------

mai.n kitabo.n me.n rakhkhū.n ye fitrat nahi.n 

phuul sūkhe hue be-zaba.n titliya.n 

----------------*-----------------

ye sahifa nahi.n meri rūdad hai 

is ka unvan hai talḳhiya.n talḳhiya.n 

----------------*-----------------

yaad kya hai koi mujh se pūchhe 'haya' 

ek ehsas ki chand parchhaiya.n 

----------------*-----------------

Hindi Urdu zindagi Duniya Shayari

Posted In : Lata Haya

09-Jul-2017
371 views

0 Comments