Bootstrap Image Preview

Main pi rahi huu.n ki zahrab hai.n mire aa.nsū

mai.n pi rahi huu.n ki zahrab hai.n mire aa.nsū 

tiri nazar me.n faqat aab hai.n mire aa.nsū 

----------------*-----------------

tū aftab hai mera mai.n tujh se huu.n raushan 

tire huzūr to mahtab hai.n mire aa.nsū 

----------------*-----------------

vo ġhaliban unhe.n hatho.n me.n thaam bhi leta 

use ḳhabar na thi sailab hai.n mire aa.nsū 

----------------*-----------------

ḳhayal rakhte hai.n tanha.iyo.n ka mahfil ka 

ye kitne vaqif-e-adab hai.n mire aa.nsū 

----------------*-----------------

chhupa ke rakhti huu.n har ġham ko laakh pardo.n me.n 

fasil-e-zabt se nayab hai.n mire aa.nsū 

----------------*-----------------

sahifa jaan ke a.nkho.n ko paḌh raha hai koi 

ye rasm-e-ijra ko betab hai.n mire aa.nsū 

----------------*-----------------

mai.n sha.eri ke huu.n fann-e-arūz se vaqif 

zabar hai.n zer hai.n eraab hai.n mire aa.nsū 

----------------*-----------------

jise paḌha nahi.n tum ne kabhi mohabbat se 

kitab-e-zist ka vo baab hai.n mire aa.nsū 

----------------*-----------------

'haya' ke raaz ko a.nkho.n me.n Dhū.nDne vaalo 

shanavaro suno girdab hai.n mire aa.nsū 

----------------*-----------------

Dard Shayari Bewafa Shayari Duniya Shayari

Posted In : Lata Haya

09-Jul-2017
161 views

0 Comments