Bootstrap Image Preview

Zindagi jiine ka pahle hausla paida karo

zindagi jiine ka pahle hausla paida karo 

sirf u.nche ḳhubsurat ḳhvab mat dekha karo 

----------------*-----------------

dukh a.ndhero.n ka agar miTta nahi.n hai zehn se 

raat ke daman ko apne ḳhuun se ujla karo 

----------------*-----------------

ḳhud ko poshida na rakkho band kaliyo.n ki tarah 

phuul kahte hai.n tumhe.n sab log to mahka karo 

----------------*-----------------

zindagi ke nam-leva maut se Darte nahi.n 

hadso.n ka ḳhauf le kar ghar se mat nikla karo 

----------------*-----------------

rahnuma ye dars ham ko de rahe hai.n aj-kal 

bech do sachcha.iya.n iman ka sauda karo 

----------------*-----------------

taish me.n aane lage tum to miri tanqid par 

is qadar hassas ho to aa.ina dekha karo 

----------------*-----------------

Taqdeer Shayari zindagi

Posted In : Manzar Bhopali

09-Jul-2017
269 views

0 Comments